İyunun 11-də minifutbol üzrə Azərbaycan yığma komandası Avropa çempionu olub. Bu, Azərbaycanın minifutbol tarixində ilkdir.
Azərbaycan Minifutbol Federasiyasının məlumatına görə, Slovakiyanın Koşitse şəhərində keçirilən çempionatın finalında Azərbaycan millisi altıqat Avropa çempionu Rumıniyanı 1:0 hesabı ilə məğlub edib. Oyunda yeganə qolu Seymur Məmmədov vurub.
Bürünc medallara Qazaxıstan yığmasını 4:1 hesabı ilə məğlub edən Bolqarıstan yığması layiq görülüb.
Azərbaycan millisi 24 komandanın yarışdığı Avropa çempionatında mübarizəyə B qrupunda başlayıb. Komanda qrupda Rumıniyaya uduzsa da (0:2), İspaniya (5:1) və Albaniyaya (1:0) qalib gələrək səkkizdəbir finala yüksəlib. Azərbaycan millisi səkkizdəbir finalda İsraili 3:0, dörddəbir finalda isə ev sahibi Slovakiyanı minimal hesabla məğlub edərək yarımfinala yüksəlib. Yarımfinalda Qazaxıstan yığması üzərində əzmkar qələbə (3:2) qazanıb.
